When sweating too much—wetin your body dey try tell you

Sweating na normal way wey your body dey cool itself. But sometimes person fit sweat much more than d body actually need.

Doctors dey call excessive sweating hyperhidrosis. E fit happen on its own, or another health condition or medicine fit cause am.

Sweating plenty no always mean serious sickness—but if you suddenly begin sweat pass normal without clear reason,

or d sweating pattern change from how e normally dey, e good make healthcare professional check am, especially if other symptoms follow.

---

🟧 Why our body dey sweat?

Sweat itself no be bad thing.

When your body temperature rise, your nervous system signal d sweat glands make dem release sweat.

As d sweat dey evaporate from your skin, e go dey help cool your body.

Normal sweating fit increase when:

• d weather hot
• you dey exercise
• you dey nervous or stressed
• you get fever
• you chop spicy food

👉🏾 D problem no be simply say person dey sweat—d question na whether d amount make sense for d situation.

---

🟧 Wetin dey happen when sweating become too much?

For some people, d nerves wey control sweating dey overactive even when d body no really need extra cooling.

D sweating fit mainly affect:

• d armpits
• d palms
• soles of d feet
• face or head

For other people, sweating fit affect most of d body because another medical condition, medicine or hormonal change dey trigger am.

Where and when d sweating dey happen fit give important clue about d cause.

---

🟧 Why e dey happen?

• Primary hyperhidrosis
→ this one often start when person still dey young and usually dey affect particular areas like palms, feet or armpits. Sometimes e dey run for d family.

• Medicines
→ some antidepressants, pain medicines and other drugs fit increase sweating.

• Hormonal changes
→ menopause and other hormonal changes fit cause increased sweating or hot flushes.

• Low blood sugar
→ sweating fit happen together with shaking, hunger, dizziness or confusion.

• Other medical conditions
→ thyroid problems, infections and some other illnesses fit cause excessive sweating.

👉🏾 If sweating suddenly start when you never dey sweat like that before, e worth checking why.

---

🟧 How you go know say e don too much?

Excessive sweating fit mean say:

• you sweat so tey your clothes don soak with seat even when weather no hot
• your palms dey so wet with sweat and e go make am hard to hold things
• your feet dey repeatedly wet inside shoes, e fit make your shoe begin dey smell
• sweating dey interfere with work or social activities
• you dey sweat heavily without any obvious reason
• sweating dey wake you from sleep

Some people go begin avoid handshake, certain clothes or social situations because of embarrassment.

If sweating dey affect your confidence or everyday activities, that alone na reasonable reason to discuss am with healthcare professional.

---

🟧 Wetin you fit do?

Depending on d cause:

• use strong antiperspirant rather than ordinary deodorant
• wear breathable clothes
• change wet clothes or socks when necessary
• keep areas wey dey sweat plenty clean and dry
→ e.g if na your feet dey sweat plenty, change wet socks and allow your shoes dry before you wear dem again
• notice whether particular foods, alcohol, heat or stress trigger am
• discuss persistent symptoms with healthcare professional

Treatment for hyperhidrosis fit include prescription of special antiperspirants, medicines, procedures
or other specialist treatments depending on where d sweating dey happen.

Excessive sweating get treatment options—you no necessarily need just learn to live with am.

---

🟧 Real life example

Femi don notice before say him palms dey sweat pass other people's own.

But as time dey go, e begin affect him everyday life.

For work, e go dey wipe him hand before handshake.
Sometimes sweat go soak d paper wey e dey hold, and anytime person notice, e go quickly joke say:

“Na heat abeg.”

One day, Femi dey prepare for important job interview.

Before e enter, e wipe him hands several times, but within minutes dem don wet again.

During d interview, as one of d interviewers stretch hand greet am, Femi become so conscious of d sweating say e struggle to concentrate on some of d questions.

Later, e vex for himself.

“Why ordinary sweating dey control me like this?”

Na that experience finally make am mention d problem during clinic visit.

After assessment, dem explain say e fit be primary hyperhidrosis—excessive sweating wey fit happen even when person no hot or nervous.

For d first time, Femi realise say no be poor hygiene and no be simply because e dey nervous.

Dem recommend strong antiperspirant wey contain aluminium chloride con explain how e suppose use am for him palms.

Dem also tell am say if that one no help enough, other treatment options dey.

After some weeks of using d treatment correctly, Femi notice say him palms no dey sweat as much as before.

E still dey sweat sometimes, but e no longer need to wipe him hands every few minutes or worry constantly about wetting papers and shaking people's hands. 

👉🏽 Excessive sweating fit look like small problem from outside, but e fit affect work, confidence and everyday activities.

👉🏽 If d sweating dey interfere with your life, treatment options dey and e reasonable to ask for help.

---

🟧 🩺 When you suppose go hospital 🚨

Seek urgent medical help if sudden heavy sweating happen together with:

• chest pain or heavy chest pressure
• serious difficulty breathing
• fainting or severe dizziness
• confusion or unusual weakness
• symptoms of very low blood sugar wey no dey improve

Also arrange medical assessment if you develop unexplained persistent night sweats, especially with fever or unexplained weight loss.

👉🏾 Sweating alone usually no be emergency—but sweating together with serious symptoms fit be warning sign of another medical problem.

---

🟢 Final Reassurance

Some people naturally sweat more than others, and excessive sweating itself fit be treatable condition.

But if your normal sweating pattern suddenly change, d sweating happen mostly at night or other unexplained symptoms follow am,
e good make healthcare professional check d cause.

👉🏾 No feel embarrassed to mention excessive sweating—na real medical symptom, and treatment fit help.

---

📚 Reference

For full medical references, see the English version of this article.

---

⚠️ Disclaimer

This article na for education only. E no replace doctor advice.

If excessive sweating suddenly start, persist, affect your everyday life or come with worrying symptoms, abeg see healthcare professional.

---

🔗 Related Health Topics

• Night Sweats
• Thyroid Disease 
• Low Blood Sugar 
• Menopause